Author Information
Pagkakait
Folder:
Filipino poems Naglakad ng paluhod sa Quiapo
Sumayaw na rin sa Obando
Hinaplos na ang kahoy na diyos
Sa wakas patitikimin Mo
Ngunit iyon ay sadya ngang patikim
Dahil saglit lang ay nawala
Naglaho, ang regalo ay nawala
Sayang ang pagluhod sa Quiapo
Buwan, taon, isa lang patikim
Sayang ang sayaw sa Obando
Hindi ba nararapat sa tingin Mo?
Bakit mo binawi o Diyos?
Tanging nais lang naman o Diyos
Mabuo ang saki’y nawala
Handang maging ina sa bigay Mo
Kahit pa bumalik sa Quiapo
At muling sumayaw sa Obando
Sana ay ‘di lamang patikim
Masakit, dinanas na patikim
Ako’y pagkaitan oh Diyos
Lahat ay binigyan sa Obando
Ang saki’y binawi, nawala
Dininig mga dasal sa Quiapo
Ako ay binalewala Mo
Huli na ako sa regalo Mo
‘Di raw pwede kahit patikim
Kahit pa magdasal dun sa Quiapo
Isang ina’y ‘di na o Diyos
Pagasa ng sanggol ay nawala
Kahit magsayaw sa Obando
Ubusin man indak sa Obando
Ngayon man ako ay dinggin Mo
Pag-asang maging ina’y nawala
Abala’y wag na kung patikim
Hindi na rin darating o Diyos
Lumuhod man muli sa Quiapo
Sayaw sa Obando. ‘sang patikim
Pinagkait Mo na o Diyos
Pag-asa’y nawala dun sa Quiapo
