Author Information
رح ضل غنّي حب
Folder:
دندنة
رح ضل غنّي حب
لينطفي هالقلب
لينطفي هالقلب
تخلص وراق العمر
تفضى خوابي العطر
وتدبل كمام الزهر
رح ضل غنّي حب
**
وشو نفع إيامي
وجنون أحلامي
وحيي وإلهامي
ان ما قدرت أترك يوم
صوتي مدى أخضر
وحلمي فجر نوّر
يزرع فرح عالدرب
رح ضل غنّي حب
***
ياما بهالكلمات
صار النوى نايات
غزلت الهوى حكايات
ضوّيت فيها الكون
من كل عطر ولون
وبين الشرق والغرب
ضلّيت غنّي حب
***
بكرا إذا فلّيت
شي يوم عالسكّيت
وتركت أهل وبيت
بيبقى صدى صوتي
بصمة بعد موتي
يقلّك سلام القلب
كيف العمر كلّو
ضليت غنّي حب
شعرت برغبة كبيرة في معرفتك
شعرت برغبة كبيرة في معرفتك أكثر،قرات جميع ما كتبتيه في منصة هواء،وبحثت عنك لعلي أجد شيئا عن امرأه لم أعرفها سابقا وأنا الذي يهتم بالشعر وقراءته
احترامي
عملي واسطه مع ماجده الرومي تغنيها لأنها وحدها بتشبه روحي
يسعدلي هالمسا