PostPoems Be Artistic. Be Creative. Be Inspired!

آدى مصر يابو النجوم

يابو النجوم ..

احلى مسا .. و احلى صباح ..

على مصرنا .. على امنا ..

على حضننا .. المليان براح ..

آدى مصر يابو النجوم ..

تقع .. تقف .. تاكل .. تصوم ..

مصريا عمنا بلد الطحين ..

و المطحونين ..

والغلابة .. و الديابة ..

و الصعايدة .. و الفلاحين..

مصر القوارب .. وسارى عالى ..

مصر المراكب ..

مصر التبن .. و الدريس ..

و صدرى عاري .. يحمى الحديد ..

مصر الابن .. مصر العريس ..

والفول بالطحينة .. و الحلبة حصى ..

مصر البليلة .. وطبق عاشورا ..

و قناية سارحة ..  

بلاص و طرحة ..

مصر الهويس ..

و السد عالى .. و نيل نجاشى ..

و نخل طارح ف العلالى ..

مصر السواقى ..

و الترع .. والارض الشراقى ..

مصر المقام .. و الحمام .. والاوليه ..

ومدد يا طاهرة .. يا ام هاشم ..

و الموالد .. و البيارق .. و الالويه ..

شيلاه يا بدوى .. مدد يا حسين ..

مصر النفيسة .. وستنا عيشة ..

و الرفاعى .. و الشافعى .. وابو الحجاج ..

مصر المساجد ..

راكع .. و ساجد ..

وطلعة المحمل .. ومعتمرين .. وحجاج ..

مصر الصيام .. و الفانوس ..

و العيدية .. و الضحية ..

والكحك .. و العجين .. و الرقاق ..

مصر عمال بتتغرب ..

و مطار .. و مينا ..

ورجوع .. ووراه فراق ..

مصر السفينة .. والبر ضايع ..

كوكتيل طبايع ..

سبع صنايع ..

مصر القلوب .. و العقول ..

و التنابله .. و المسطولين ..

مصر المبدعين .. و الفنانين .. و المشهورين ..

مصر محفوظ .. و الحكيم ..

مصر زويل .. و عمرو موسى ..

و عبد الحليم ..

مصر الجيوش .. جدعان وحوش ..

مصر الجنية .. و الملاليم ..

و بلد القروش ..

مصر السواحل .. مصر الجبال ..

مصر رمضان .. و الهلال..

وعيون كواحل ..

مصر المسارح .. و اللى سارح ..

بعربية بطاطا ..

و كوزين درة .. وبقرش ترمس ..

اخر بساطه ..

مصر يا عم نجم ..

استمارة .. و ختم ..

وروتين بيخنق ..

و تعميرة على حجر معسل ..

و حنضل .. ومر ..

وموظفين وشوشها عكرة ..

ووشوش تسر ..

مصر الترولى .. والاتوبيسات ..

و المترو .. و الترام ..

ابو قرش صاغ ..

مصر الفزب .. و الموتوسيكلات ..

و الخنزيرات .. و التمسحات ..

امات عيون ..

و البسكلته .. و الكاروهات ..

مصر الفراعنة ..والاهرمات ..

و المعابد .. و المقابر ..

و المتاحف .. والمسلات ..

مصر القنال .. و البحر الاحمر ..

و اسكندرية .. و بمبوطيه ..

و الولاد .. وام العيال ..

مصر السادات ..

مصر جمال ..

مصر اكتوبر .. و يونيه ..

و القنطرة .. و شدوان ..

ورمل سينا .. و رمل طابا ..

عرفت يابا ..

مصر الهزايم و الانكسارات ..

مصر المعارك .. والانتصارات..

آدى الحقيقة ..

شويه فوق .. و شويه تحت ..

شويه نشب .. و بعدين نقع ..

نقوم .. نقف ..

و شويتين .. بعدين نقب ..

ـــــــــــــــــــــــــــــــــــــــــــــــــــــــــــــــــ

طارق المملوك

24/4/2004