Author Information
WELKOM LENTE
vir jou skryf ek woorde, september
vir jou wil my vingers net sing
vir jou met jou bloeiselbeloftes
met jou waarword en weerbegin
vir jou met jou knoppiesklein kleding
aan winter se kaalbas-verlang
vir jou met jou sierlike strikke
om die blom van my hart vas te vang
vir jou word ek bytjie, september
wil ek nektar kom teug uit 'n kelk
wil ek stuifmeel versprei oor die velde
wil ek keer dat die Lewe verwelk
laat my toe om kaalvoet te huppel
oor die groen van jou kieliejong kweek
en loop ou gedagtes dalk kruppel
maak my weerloos en effentjies week
o september ek wil jou nie groet nie
laat my reis van begin tot begin
ek wil nie in winter vertoef nie:
ek's september - en lente - s'n
vir jou skryf ek woorde, september
vir jou wil my vingers net sing
vir jou met jou bloeiselbeloftes
met jou waarword en weerbegin ... en weerbegin
Hi Myra, dit voel soos gister wat ek nog saam met jou koffie gedrink het en betower is deur jou lentebries aura. Sal graag wil hoor hoe dit gaan! Dankie vir jou wonderlike bydrae tot Afrikaans literatuur. Groete, Jaco Ackermann
Oeg, Myra - dis baaaaie mooi! Groetnis Donkerman