Author Information
Paghahanda sa paglipad
Folder:
Filipino poems Ako’y nagnais lumipad
Matayog, tungo sa langit
Pagmasdan ang mundong hubad
Burado lahat ng pangit
Kahapon ay lilimutin
Mga pait nito’t lungkot
Bukas ko ay susugurin
May tulin at walang takot
May lakas sa pagpagaspas
Sa malapad na pakpak ko
Dulot ng hangin ay lakas
Sa pakpak ko ay nagpayo
Suungin ang himpapawid
Paligid ‘di alintana
Sa kalawaka’y tumawid
Bukas ay naghihintay na
Pangarap na matatayog
‘Di na malayo sa tanaw
Sa aking bagong indayog
Pakpak ko’y ‘di na aayaw
At sa paglipad na nais
Tiyak kalaban ang pagod
Paghahanda na ay labis
Nang tagumpay ay mahagod
