Author Information
مين قال أنا وحدي
Folder:
أغاني
مين قال أنا وحدي
أنا جوقة عْصافير
وكروم بلا نْواطير
وساقيه و ورده
أنا شمس ما بتملّ
يطلع صبح لتطلّ
نور ودفا تهدي
قلبي ليالي الصيف
بنطر خيالو طيف
ايدي على خدّي
*
وأنا شعب من آلام
بدّو من الحكّام
يخلّو الوعد جدّي
وأنا كل نساء الأرض
حبّن صلاة وفرض
للجنّه بيودّي
انا ثورة الأحرار
سمّوها طير النار
بلكي الفضا يقدّي
*
جوّاتي ناس كتار
شي طفل شي ختيار
بيتجمّعو عندي
واحد متل مجنون
والتاني عقلو كون
والتالت مصدّي
ولما اجي ل نام
وحدا معي الأحلام
بتغفا ع المخدّه
