PostPoems Be Artistic. Be Creative. Be Inspired!

الحب طير رفرف كما فرخ اليمام ..

جناحه حنه .. وصوته غنى .. هز الجسد ..

جمع ما بين بنت البلد ..

ويا الحليوة .. ابن البلد ..

مهما تقول فى وصفهم ..

يبقى الكلام .. ناقص كلام ..

اصل المعانى ف حبهم ..

عم تتولد .. ف عيون جمال ..

عيون صبية بنت البلد ..

صبيه جدعه .. تشيل همومك .. ماتنحنيش ..

ولو غموسها .. لقمة بدقة ..

تاكلها ناشفة .. ماتشتكيش ..

بدر التمام تديها عيش ..

يصبح وليمة .. على يدها ..

تعزم عليه كل الجيران ..

والكل جار .. جوه البلد ..

شايف كمان .. ابن البلد ..

مايهدهوش ظلم الزمن ..

اصل الولد .. من صلبنا .. طرح الوطن ..

داق المرار .. يوم ماتولد ..

دايب تعب ..مع كل ده ..

عايش وراضي .. بالنصيب ..

شوف ضحكته .. عنقود عنب ..

وف كل يوم موال جديد ..

لعيون صبية.. شايله القلل ..

حامله القنانى ..من جوا داره ..

على شط ترعة .. ف ريف بلدنا ..

تبدر محبة .. و البت شابه ..

والواد جدع .. عاوج الطاقيه ..

وف ايده ناى ..

تحت الشجر .. ف المغربية ..

وصبية جايه .. معاها شاي ..

و الشاي تقيل .. زى الهموم ..

بس الجميل .. نسيوا قوام ..

مع حبهم .. طار اليمام .. فوق حدهم ..

دفى القلوب .. رفرف سلام ..

كتب الجناح فوق فى السما ..

احلى كلام ..

ف عيون صبية .. وحليوة اسمر ..

عاشوا ما بينا .. اخر تمام..



15/5/2006