PostPoems Be Artistic. Be Creative. Be Inspired!

انا راجع مصر تانى





انا راجع مصر تانى.. 70 مليون ونيس ..

و اغنيلكم اغانى.. بس ابقى انا العريس ..



هاطوف جوا الحوارى .. اعلق 100 هلال ..

مش هاقرف م المجارى .. هالعب ويا العيال ..



اشوف وشوش بسيطة .. اكلى صحن فول ...

دى حوارى ع الخريطة .. خللى اللى يقول يقول ...



انا راجع مصر يمكن .. القى الحل البسيط ...

مش مستحيل ده ممكن .. ماتقولش كلام عبيط ..



ع الحب وع الصراحة .. لازم نبنيها تانى ..

ونجيب خبير مساحة .. يشوف مين الانانى ..



هازور خالى وعمي .. واقرا الفاتحة لابويا ..

وابوس على كف امي .. واخد بايد اخويا ...



مش هاهرب م الضرايب .. مش هاكسر الاشارات ..

وهازور كل القرايب .... ننسى كل اللى فات ..



نزرع من طمي نيلنا ... ومانمدش ايدينا ...

دى ارض فيها خيرنا ... وبتضلل علينا ...



انا راجع مصر تانى ...

انا راجع مصر تانى ...







طارق المملوك

31/5/2005