PostPoems Be Artistic. Be Creative. Be Inspired!

اللى بنى مصر هندسها ..

منارة .. ومدنه .. وهرم .

اللى بنى مصر ابدعها .

علم و فن .. وقلم .

واللى خلقها سولها .

خضرة .. ومايه .. وكرم .

واحنا بادينا زارعينها .

ظلم .. وقهر .. والم .



* * * * * *



اللى بنى مصر مش احنا .

دولا ناس تانيين .

نفس الشبه ممكن .

نفس المكان يمكن .

لكنه مش ممكن .

ننتمى ف يوم ليهم .

مش منهم احنا .

لا كنا احفادهم .

ولا احنا اولادهم .

احنا اكيد جينا .

ارضهم مستعمرين .

سارقين حضارتهم .

ناهبين مداينهم .

سارقين اساميهم .



* * * * * *

اللى بنى مصر مش احنا .

دولا ناس تانيين .

ماتوا اكيد قهرا .

لكن وسطنا ساكنين .

متحنطين .. متكفنين .

لكن .

باصين لنا .. شايفين ..

يتحسروا .. يتقطعوا ..

تاريخهم اللى كان مكتوب ..

وخيرهم اللى صار منهوب ..

اللى بنى مصر مش احنا ..

اللى بنى مصر ريحنا ..

ونجحنا .. وعيشنا .

وفرحنا ..

اللى بنى مصر خططها ..

بدقه .. مهارة .

اللى بنى مصر زوقها .

شارع وحارة .

اللى بنى مصر علاها .

صنع حضارة ..

واللى يقول بنينها .. يدينا الامارة ..

ويستاهل يبقى العريس..

هوا اكيد مش مننا ..

خاين .. خسيس ..

هوا احنا شاركنا .. ؟ ولا تعبنا ..؟

ولا شقينا ..

لو كنا قاسينا .. كنا اكيد متنا ..

كنا ادارينا .. كنا ف يوم غيرنا ..

اللى بنى مصر .. دولا ناس غيرنا ..

واحنا خيبتنا بتاكد .. اننا سارقين ..

مستعمرين .. متجنسين ..

ومنجسين ارض الحضارة ..

بالخيبة التقيله ..

مصرالجميله .. مصر العظيمة ..

مصر الاصيله ..

صارت على ايدينا قتيله ..

واحنا لا جهزنا .. لا كفِِنا ..

لا صلينا .. ولا حتى بكينا ..



* * * * * *



طارق المملوك

10/5/2005