PostPoems Be Artistic. Be Creative. Be Inspired!

يا قدس يا ارضى . هيجيكى يوم ترضي ..

هافديكى يا عرضي .. دمعك بيكوينى .



نفسي اشوفها معاك . و قدسي تكون سمعاك

شيفانا واحنا هناك .. دمعى على عينى .



لو حتى مين سابك .اموت على بابك ..

شهيد ف احبابك .. طينك مكفينى ..



لا تقولى ده سودانى .. لا ليبي لا عمانى..

انا عربى انسانى .. مصري .. فلسطينى..



بقول يا روح الروح .. الناس تيجى و تروح..

وانت اللى جواه الروح .. يا قدسي ادعينى .



النصر ليكى اكيد . جايلك بالف شهيد ..

نصرك ده يوم العيد .. جايلك يا حطينى .



قبري يكون فيكى . جسدى يكون ليكى ..

وبعمرى افديكى .. ف حضنك تضمينى .



بدعي يجينى اليوم . اجرى عليكى واقوم..

اصلى فيكى واصوم .. عاوزك تزكينى .



طالب يا ارض التين ..  تدينى كلمتين .

شهاده يوم الدين .. انك سامحتينى .



ـــــــــــــــــــــــــــــ



طارق المملوك

24-11-2004