PostPoems Be Artistic. Be Creative. Be Inspired!

ايه هى مصر

البنت سمرا .. وذكية ..

وعفية .. ومتأصلة ..

تزكى .. تصوم ..

وتتشاهد .. وقايمة الصلا ..

تعرف ربها .. بحكمة ..

وملهمة..

معجبانية .. وماريه ..وزئبقية ..

تقدر معادن كل البشر ..

تعرف مين اللى غالى ..

ومين رخيص .

ومين تتاقله بقلبها ..

ومين اللى واطى .. ومين خسيس..

دارسه العلوم .. فن و أدب ..

مكتبة اسكندرية .. و حجر رشيد ..

ودار الكتب ..

محفوظ .. زويل .. ومشرفه ..

لكتاتيب فاتحه البيبان .. لامنحتب  ..

ثقافة .. موسيقى .. وفلك .. وحساب ..

عمارة .. وتل حكم ..

قول .. واكتب .. يا قلم ..

عشاقها ياما .. من سالف الزمان ..

بطالمه .. وتركوه .. ورومان ..

مسلمين .. افارقه .. ويونان ..

عاشوها .. و عشقوها ..

لبسوا توبها .. ومجدوها .. من قبل الاوان ..

واللى لم عشق .. وصار غازي..

تتفتح المقابر .. و المرازي ..

وتعيش الصبية .. حرة ..

صولجان .. وتاج .. ودرة ..

دى عروسة حلوة .. بس متأثرة ..

بكرة تفوق وتتعايق .. باولادها ..

اصلها يا خلق حرة .. ومتأصلة..



طارق المملوك

4-11-2004