Author Information
براهيم الطيب ابراهيم :ود عجبنا
Folder:
حلمنتيــــــــش ود عجبنا
عمك الحاج ودعجبنا في الفريق ياهو الركيزه
هو البشيل حمل الرضاعه وعندو كلمة علي الجماعة
في الريق باقلنا تايا وكل طيب ليهو غاية
للضعيف تلقاهو ساند يقهر الكعب المعاند
للضيوف ديوانو فاتح
جيهو الديوان فراشو الاباريق و التبارق
و افرشوا الفرشا الكبيرة واضبحو الحمل المدوعر
عمنا الحاج ودعجبنا من زمان ايام جهلتو
ديمة في دعوات صلاتو يسأل المولي السلامة
سترت الحال و الكرامة
وفي ليلة من ذات الليالي وفي زمن حظر التجول
جاهو ضيف فوق راس حداشر(11) رحب الحاج بيهو جدا
فرشولو و نزلوهو وكاسو للعشا ما إتلقاهو
ما الرغيف ممحوق مقصر و البلد في حال معكر
و عمنا الحاج في مبادؤ وجبت الضيف ذي فريضة
وهسي ماقبل العريضة ضيفو كيف اترك عشاهو
قلبو ذايد في إختشاهو
جاتو فكره إمشي للفرن المجاور
ولي رجال العيش يحاور بس عشا الضيف يا جماعه
ضيقي نازل ليهو ساعه
شاكلهو ونهرهو و دفروهو
وجاتو دورية الطواري وامس بايت في الحراسه
ناس جنو ولي الصباح ما عرفو حاجة
وين دا روح ؟
جاهون الخبر المؤكد ودعجبنا في الحراسه
ناسو اولادي و بناتو عرفو حالو وبدري فاتو
راحو محكمة الطواري بقي في نص الخلايق
شافو حالو الماهو لايق عمنا الحاج بي جلالو
فوقو حس الصوت يولول فوق قفاهو وفوق ذنودو
وفوق رجولو و مرة فوق عرج حشائم
اصلو ما قايل بهونن حتي لو نزلن هجايم
الا لكن الليالي لو بترخص كل غالي
حاكمو الولد امنصب كتفو بالدبور مقصب
انت يا حاج يا مخالف زول مخرف و عقلو تالف
انت يازول ماكا داري زلة الناس في الطواري
غرموهو واجلدوهو و نفذو الحكم البهينو
شان إفتح تاني عينو
تسمع الصوت ليهو خاوية وعمك الحاج صيحتو داويه
كل جلده جبل مزله في ضمير الحاج وقلبو
وكل كرباج الف عله
وفجأه رفع الحاج عيونو شاف بنات ولدو وبناتو
كلهن واقفات يعاينن
دمعتن في العين ترقرق و وجعتن في الجوف تحرق
و الحزن بينن يفرق للنجوم الفي سماهن
دا الزمان الكان حدهن
وكل صوت نازل عليهو من شعاع الضو عماهن
عمك الحاج دمعو سرب وسيلو فوق اشنابو غرق
تم حكمو وراح بيوتو نفسو مكسورة وزليله
وكيف ملاقات الحليلة صاحبة الروح العزيزة
في البيوت الجوة غادي عمك الحاج ما اعتيادي
فوقو متلمين جماعه والسكيلي ضربت حزاين
قالوا نادهو المنادي
يفارق الدنيا المهينه ويقطع الزلة وسنينا
في فراش حاج ودعجبنا تسمع الزول البوصي
اقفلو الحوش يا جماعه وطفو انوار الرتاين
داك حرس حظر التجول من بعيد ليكم يعاين
يـا زمن حظر التجول
ويـا زمن حظر التجول .
Author's Notes/Comments:
