Author Information
HAIKOE: VERLIES
water dupliseer
die wêreld: sagter, dowwer
verdubbelde leed
brander se breekslag
die sakkende son splinter
spoel uit in skerwe
hier lê 'n veertjie
iewers sweef die gevlerkte
onvolledig voort
die see dein verder
dein verder as sien ... as son
ook in donkerte
die maal is verby:
ek skud die tafeldoek uit
'n vlinder vlieg weg
musikale rou
één duif herroep koer-kore
weggebrande woud
wildegans vertek
gly-gly verlang se sysie
flap kortasem saam
geheimsinnig, j
wat betekenis put
uit troebel water
(geskryf deur my broer, in 'n droom van my)
swaeltjie sirkelsoek
van sondag tot donkernag:
sy wyfie vermis
bruin brokkelklei swyg
stukkende swaelnessie
voëlverlate
agt pootjies gevou
in tevergeefse gebed
dooie spinnekop
