Author Information
Peklat
Folder:
Filipino poems Nadapa
ilang buwan na
ang nakararaan.
Mababaw ang natamong sugat;
ngunit matagal naghilom.
Pilit ginamot
kahit
makirot sa tuwing sinasabon,
mahapdi kapag inalkoholan,
makati kung binubudburan ng penisilin.
Nang matuyo
tinungkab ang langib
subalit ito'y muling dumugo.
Nakadidismaya
Nakahuhulas ng pag-asa
Nakapanghihina ng loob.
Hanggang
kusang natuklap ang langib,
nahulog nang di namamalayan.
Nakagagalak
na nakalulungkot
ang markang naiwan:
Ala-ala
ng pagtahak sa malubak na landas,
ng di pag-alintana sa mga babala,
ng kapabayaan.
