Author Information
Marahan, Pook Tawiran
Folder:
Filipino poems Kumaway ka sa akin
mula sa kabilang bangketa.
Naisip ko na salubungin ka.
Madaling nagsalitan ang aking mga paa
at bumalik ang gunita.
Naghabulan ang mga paa mo
patawid sa puting mga linya
sa kanto ng Junction,
palayo sa mga bisig ko
na wika mo
ay sumakal sa iyo.
Sinilip kita.
Sa likod ng talon ng aking luha,
lumiit ang iyong imahen
nang ikaw ay sumampa
sa kabilang bangketa.
Ginising ng sigawan ang ulirat.
May mga businang nag-amok,
mga prenong nagdabog,
mga gulong na umusok.
Sinilip kita.
Sa likod ng talon ng aking luha
lumalaki ang iyong imahen.
Marahan ang salitan
ng iyong mga paa
habang tinatahak
ang pulang mga linya.
