PostPoems Be Artistic. Be Creative. Be Inspired!

Habang nagaayos ng kulurete'y

nagkekwenta ng pamasahe.

Syete pesos sa traysikel,

syete sinkwenta sa dyip.

Araw araw na sistema

bago pumasok sa eskuwela.

Alas syete y medya.

Ganado ang inglesera.

Magtuturo ng pagsulat

sa estudyanteng minumulat

sa ingles, na nais nilang matutuhan

nang sa Amerika'y makapagpayaman.

Ingles sa umaga.

Hanggang tanghali inglesara.

Kasunod na babanataan

ay pakikipagtalastasan.

Tamang boses na pandiga

at diksyon na pang Amerika.

Komunikasyong pangnegosyo:

Mga bata'y kelangan matutuhan ito

nang sila'y makasulat

ng resume na panggulat,

at sa interbyu sila'y makasagot

nang hindi nanlalambot.

Mula komunisyon

sa sining tatalon.

Utak ay pipigain

upang maiba ang hain,

dahil humanidades na ang pasan

at pangdaigdigang panitikan.

Matapos ang inglesan,

tagalog naman ang turuan.

Dila'y medyo malilito

dahil sa pagpapalit ng takbo.

Ngunit utak ay pipigain

nang pagbasa't pagsulat ay kayanin.

Komunikasyo'y walang problema.

Ang sining ay kayang kaya.

Pagbasa't pagsulat ay gayundin.

Ngunit may ilang aaralin,

Ang Philippine History at Society,

muntik pang pati NSTP.

Mahaba ang isang araw

pero pag-ihi'y ninanakaw.

Pagkai'y pinapaspasan

Oras ay dinadasalan

Upang uwian ay agad madama

nang sa bahay ay makapahinga.

Hapo at wala nang kulurete,

magkekwenta ng pamasahe.

Syete sinkwenta sa dyip

Syete pesos sa traysikel,

Araw araw na sistema

Pagpasok at paguwi mula eskuwela.