Author Information
ضلع قاصر
Folder:
اغاني ٣
ياما قالو ألف مره
إلبسي ستر الملايه
ضيعي في الزحمه تمللي
و ادخلي سمعاً و طوعاً
قصر والي
من دموعك
علّا مملكة الولايه
وياما لامو
خدتي ايه لما انتي جيتي
و اتمليتي
بوهم انك حاجه تانيه
حوّا أمك
غير دين العشق
ما عاشت روايه؟!
وياما عادو
رحتي فين
لما انتي طرتي
في السما و الصيد شرع
و صوتك ينادي عماهم
كونو للحق المرايه؟!
عشتي في الدنيا غريبه
روح تغني الحب غايه
والسؤال جرّ السؤال
والجواب سكّة عذاب
لما شافو في غناكي
بومه تنذر بالخراب
وكل واحد
زاد سطر على الحكايه
وفوق جبين الفجر اسمك
ضلع قاصر
يكتب العهد الجديد
بحرف سافِر
منك مبدا كل شيء
والولاده والنهايه
