Author Information
وجع
Folder:
اغاني
عم تسألي الموجوع شو صابو
و ليش هيك مكشّر عن نيابو
ما كان قبل شوي كيوت و ذوق
معقول كان مخبّا بتيابو
لا تسأليه.. اسألي المسؤول
كيف شلّحو حتى من ترابو
وعتّم ب ليلو ضو ذاكرتو
و خوّن حنينو و شقشق كتابو
خلّا صابيعو مغمّسه بالدم
بلقمه ذليله و فاضيه جيابو
صبح ومسا عم يشحد حقوقو
عا باب وقفو عليه نوّابو
ما فيه عم ينطر قدر خاروف
ولا قادر يعيش بخسّة ديابو
لا تسأليني و لا تسألي المسؤول
روحي اسألي بالأصل مين جابو
أو اسألي رب السما العالي
ل إيمتا ساكت ما دمنا أحبابو
