PostPoems Be Artistic. Be Creative. Be Inspired!

o my geliefdes

hoe kan ek julle vertroos

as julle soos sterre so ver is?

ek wil julle tel

soos 'n hen haar kuikens

vir julle wat soos winde verspreid is

wil ek liefkoos en soos kinders sus



is dit moontlik om die wind

of 'n kind vas te hou?

moontlik om julle soos sterre te tel

sonder begrip van getal

en julle toe te vou

onder sorgsame vleuels?



ek kan julle nie meer aanraak nie:

nie met my helende hande nie

nie met my liefdevolle oë nie

nie met die voedsel van my tafel nie

nie met die knoppies aan my roosstruik nie

ook nie met my gewyde woorde nie



my trane het 'n dowwe snoer geword

my hartstog 'n halfgedrinkte kelk

my vrede het 'n vergete hawe geword

my vreugde 'n skadublom wat ongesiens verwelk



soggens stotter die voëls my wakker

soek die son na jul verdwaalde spore



hoor my oerversugting:

ek wil die tortels van my gebede om julle vlerk

met my gepluimde drome vir julle 'n tuiste bou

kyk: in jul are sal julle die geboorte

van my gedagtes bemerk:

met as nagedagte

'n nedersetting

van onthou