لما كان البحر أزرق

(هي)



لما كان البحر أزرق

والنجوم لسه ف مكانها

وطيور بتحلم فوق الشجر كل يوم

لما كان ممكن أصدق

إن السعادة كلمة واحدة

ما كنتش أقدر أقرا ما بين السطور



كنت عايشة ما بين إيديك

كنت السراب تحت السما

وكان هناك البحر أزرق

لكن في يوم كان لازم أبدأ

أعيش حياتي وأخلق لذاتي كيان



(هو)

اديتها سنين حياتي

اديتها كل حاجة

علمتها تجاربي

الحب ، السعادة

الصبح سافرت

وسابت لي ورقة

"حاختار طريقي"

الشمس طلعت

وهي بعدت

وأنا وحيد



(هي)

تاهت ملامحي بالملح

حتى أفكاري وخيالي

حتى أحلامي وإرادتي

كنت نورك وكنت ضلك

واكتشفت من تجاربك

اللي يوم علمتها لي

إني لازم أكون أنا عشان

أحبك انت

والمس بنفسي:

إن لون البحر أزرق

إن النجوم لسه ف مكانها

وطيور بتحلم فوق الشجر كل يوم

لأن كان  إزاي أصدق

إن السعادة كلمة واحدة

لكن حادور وأقرا ما بين السطور





كلمات: هاني زكي

ألحان وتوزيع: هاني شنودة

غناء فرقة المصريين

1980

View wnature's Full Portfolio