Author Information
هوامش
Folder:
أغاني
على هامش مقتل الشهيدة # آيات_الرفاعي بيد الزوج "الشرعي" وأهله.
# لا_للعنف
همَّشْتِني .. أنا قلت مالو
في الهوامش مُستراح
وحِتّه فاضيه ..
وليّا في لذة الإهمال فُسحه و بَراح
من بشر حاكْمه وقاضْيه
و لابسه قدّام عُري روحي
التُقى و توب الصلاح
أما ترميني كده
برّا الهوامش والسطور
وتبقى وحدك على الورق
يا ديكتاتور
حلاقيني أنا الحكايه
وشهرزاد الحبّ بكتاب الولايا
والوحي اللي في حروفك
فاض وفضفض لما باح
واسألك
والجرح بيداري وراه تاريخ جراح
كنت فين لما الحياه بتتدبح
نايم بتحلم بالعسل ؟!
ولا بتكتب عن المحبه والأمل ؟!
ولا سكران زيهم بكاس السماح ؟!
واسألك
أمّا نبكي ونندهك
وندقّ أبواب الرجا ونقول كريم ما أعدلك ؟!
ليه الجواب بيكون سكوت
زي ما تكون حياتنا مش اكتر من تابوت
مكتوب عليه كل حاضر اسمو ماضي
و كل ماضي عدّا وراح
طيب خلاص
من قبر اسمو الدنيا يا حبيبي لا مناص
ودمّنا أهو زي روحنا يتهدِر .. عادي ومباح
بس لا وألف لا
ما قدرش أقول للوحش "اقتل
حقّك الشرعي تمارس سلطتك
فالكل راعي والكل مسؤول عن رعيتو
أو دورها النباح "
ابتدت مرّه بسكوت
والسكوت اقرار رضا
لما جيوش العنف صارت اجتياح
