Author Information
سعاده
Folder:
دندنة
#سعاده
متل العادة
طلعت دوّر عالسعاده
اسأل عنها .. اذا حدا شافا
بنت صغيره حمر شفافا
عيونا وساع والف شراع
بيرسو من تعبُن عَ ضفافا
وضحكتها سكّرها زياده
ضيّعتا من عمر اللهفه
ومن يوما بنطر شي صدفه
تسمّعها قلبي ال بينادي
متل العاده
طلعت دوّر ع السعاده
مرقو متلا ولاد زغار
لكن بعيونُن في قهر
وبلعبُن في ضرب وكسر
وبيقرو بكتبُن عن أرض
خيراتا يا طول وعرض
بس ما بتشبه ظلم بلادي
دخلت البار
طلبت قنيتين كبار
شربت شربت
حتى دخت
وبدل الضحكه اللي ناطرتا
عيوني يبكو ودمعن نار
ومتل ال كأني بوادي
والسعاده بتاني وادي
قلت بلكي متخبايه
عني بِ شي قلب مسكّر
وفتحت قلوبن يا ريت
ما فتحتا ولا عتما خبّر
كلُّن متلي عمرُن هرهر
وهنّي عم يستنو الجايي
وهال جايي قديش تأخّر
وما تابو عن هي العاده
مين عارف وين السعاده
يمكن بِ زهره بريه
يمكن بأوهام الحريه
يمكن بقصيده كذّابه
يمكن باللون ال بتيابي
ويمكن يعني أكيد كتير
بضمة محبه من ولادي
